Line Dybedal ute med debutalbum

Line Dybedal slepp  debutalbumet “Til kjærleiken” på bursdagen sin 12. februar, etter eit suksessfylt år med fire av fire singlar lista på nasjonal radio. Siste singel «Et evig ønske» vart A-lista på NRK P1 basert på ein demo. Ho prøvde seg på engelsk i fleire år, men det var fyrst då ho byrja å synge på den vakre nordfjorddialekta det verkeleg losna.

«Noko så naturleg som å syngje akkurat slik ein snakkar, det trur folk på. Det vert så ekte og nært.»

Samstundes med plateslepp flyttar Dybedal heim til garden i Selje, der ho og mannen ventar sitt fyrste barn.

«Ein kan skrive musikk uansett kvar ein er i verda. Eg håpar og trur at nærheita med fjella, dyra, og havet vil gje meg mykje inspirasjon. Huset vi skal bu i har vore fylt med musikk igjennom 200 år, og når mannen har bygd studio i lada som står rett ved sidan av, så eg har tru på at dette skal bli rett så festleg.»

“Til kjærleiken” består av åtte låtar skrive over ein periode på 5 år, der fleire av låtane er oversett frå engelsk til norsk. Låtane handlar om nokre av utfordringane igjennom desse åra. Nokre personlege, nokre om det å omstille frå å vere bandmedlem til soloartist, og eit par kjærleiksviser.